Михаил Петрович Петров
1905–1955
Удмурт прозаик, кылбурчи, драматург но кылысь кылэ берыктӥсь.
«Знак Почёта» но Горд Кизили орденъёсын, озьы ик пӧртэм медальёсын пусъемын.
Литературно-биографической экскурсия
1905–1955
Удмурт прозаик, кылбурчи, драматург но кылысь кылэ берыктӥсь.
«Знак Почёта» но Горд Кизили орденъёсын, озьы ик пӧртэм медальёсын пусъемын.
Михаил Петрович Петров вордӥськиз 1905-тӥ арын 21-тӥ шуркынмонэ Татарстанысь туала Менделеевск ёросысь Вандэмо (Монашево) гуртын.
Трос шуныт кылбур чуръёссэ кылбурчи сӥзиз вордӥськем гуртэзлы:
Быдэ вуытозь тон монэ будэтӥд,
Вожой шур дурысь вож садо Вандэмо.
Мынам малпанам тон али но дуно:
Вордэм мемиез кадь, шуныт яратӥ
Тонэ, Вандэмо…
12 арескысен Миша анай-атайтэк кыле. Школаын дышетсконзэ йылпумъяса, 1921-тӥ арын со Можгаын партилэн уездной комитетаз регистратор луыса ужаны кутске, татын ик комсомолэ пыре. 1923-тӥ арын Ульяновске военной школае дышетскыны келяло. Сое йылпумъям бераз, М. Петров Горд Армиын но кунэз утёнъя органъёсын служить каре.
Ӝоген М. Петров службазэ кельтэ. 1933-тӥ арын быдэсак гожъяськон удысэ выже: нырысь «Удмурт комунна» газетлэн редакцияз тырше, собере «Молот» журналын.
1931-тӥ арын потэ солэн «Ваче пинь» веросъёсын бичетэз, нош 1934-тӥ арын — «Ошмес син» кылбуръёсын нырысетӥ бичетэз.
1930-тӥ аръёсы Михаил Петров фольклор экспедициосы пота, удмурт калык кырӟанъёсты, калык веранъёсты, дауркылъёсты, шудонъёсты люка. Удмурт калык кырӟанъёсын кык бичетсэ но шудонъёсын нылпиослы книгазэ поттэ.
1941-тӥ арын Быдӟым Атыкай оже кошке. Москваысен Кёнигсбергозь секыт ож сюресъёсты ортче. Татын, улон но кулон вискын но, Петров-фронтовик гожъяськемысь ӧз дугды. Гожъяз романтизм мылкыдо кылбуръёссэ, поэмаоссэ. Тани со К. А. Камский (Потеряев) журналистлы гожтэтаз вера:
…когда я так один на один думаю о поэзии, о своих стихах, перспектива меня часто пугает, с меня будут требовать стихи тяжелые, точно вот такие же, как эти охающие разрывы наших бомб <…>, но я едва ли смогу переключиться и забыть свой лирический тон. Вот, например, с час тому назад мы стреляли по самолетам трассирующими пулями — как красив их яркий полет….
К. А. Камский (Потеряев)
Войнаын кышкатэк ожмаськемез понна М. П. Петров Горд Кизили орденэн пусъемын вал.
Война бере Михаил Петров Удгизлэн директорез луыса ужаз, Писательёслэн огазеяськонэнызы кивалтӥз, озьы ик «Молот» журналлэн редакторез вал. Котькыӵе удысын со рос-прос ужаны быгатылӥз.
1945-тӥ арын М. Петров гожтэ «Италмас» поэмазэ. Солэн инъетэз удмурт калыклэн мифологиез луэ.
1961-тӥ арын М. Петровлэн «Италмас» поэмаезъя Музыкально-драматической театрын нырысетӥ йӧскалык балет пуктэмын вал (кылдытӥз Г. М. Корепанов-Камский). Нош 1996-тӥ арын Удмурт йӧскалык театрлэн сцена вылаз «Италмас» спектакль мынӥз.
1947-тӥ арын Михаил Петров «Кырӟан улоз» поэмазэ гожтэ но «Советской Удмуртия» газетын печатла. Нимысьтыз книгаен та произведение потӥз 1950-тӥ арын. Поэмазэ автор ожын бырем удмурт кылбурчилы Филипп Кедровлы сӥзе.
«Мултан уж» тема бордын М. Петров ог кызь ар ӵоже ужаз, сое драматургия но проза амалэн усьтыны тыршиз. 1934-тӥ арын потӥз «Зӥбет зурка» пьесаез, 1940-тӥ арын — пьесаезлэн «Вуж Мултан» нимо вариантэз. Огвакытэ ик гожъясьчи роман жанр борды басьтӥськиз, но война солэсь ужзэ куспетӥ кариз. Романэзлэсь нырысетӥ вариантсэ автор 1947-тӥ арын вуттӥз но сое «Жильыен дуремъёс» шуыса нимаз. Берло М. Петров произведенизэ тупатъяз но 1954-тӥ арын сое «Вуж Мултан» нимын печатлаз. 1956-тӥ арын роман ӟуч кылын потӥз, берыктӥзы сое А. Дмитриева но М. Петров. Ӟуч кылын потэм романзэ автор ӧз ни адӟы.
Реализм амал вылэ пыкъяськыса, историысь зэмос луэм учыръёслы огъянъёс лэсьтыса, ваньзэ пыр-поч радъяса, гожъясьчи «мултан ужез» пушласянь сэрттэ-пертче; удмурт калыклэн гинэ ӧвӧл, быдэс шаермылэн историяз луэм учырлэсь интызэ валэктэ, яркыт суредъёсын сое суреда.
Тодосчи Ф. К. Ермаков М. Петровлэн «Вуж Мултан» романэз пумысь
Тодэ, кытын юнматэмын та буре ваён пул.
