Григорий Сергеевич Медведев

Литературно-биографической экскурсия

Григорий Сергеевич Медведев

Литературно-биографической экскурсия

Бусыгина Людмила Васильевна
Дышетон удысысь йӧскалык ужпумъёсты
эскеронъя тодос институтысь ӧнерчи

Григорий Сергеевич Медведев

1904–1938

Удмурт гожъясьчи, публицист. Нырысетӥ удмурт трилогилэн авторез.

Григорий Сергеевич Медведев вордӥськиз 1904-тӥ арын 5-тӥ южтолэзе туала Татарстанысь Балтаси ёросысь Малые Лызи (Лӧзя) гуртын.

Лӧзяысь куинь классъем покчи ёзо школаез йылпумъяса, дышетсконзэ азьланьтыны ӧз быгаты, малы ке шуоно со вал куанер но трос нылпиё семьяысь (ваньмыз сизьым кузя вал). Егит пияш пичи дырысеныз атаезлы юрттоно луиз. 1919-тӥ арын Г. Медведев Алабгоысь епархиальной училищелэн ньыль аръем педагогической курсаз дышетскыны пыриз. Кыкетӥ курсысен, Колчак вуэмен, дышетсконзэ куспетӥ кароно луиз. 1920-тӥ арын со Казаньысь рабфаке пыриз, но ӝоген отысь кошкиз.

Г. Медведевлэн Татарстанысь туала Балтаси ёросысь Лӧзя гуртысь вордӥськем юртэз.
Лӧзяысь 8 классъем школа

1922–1925-тӥ аръёсы Григорий Медведев Можга педтехникумын дышетскиз. Татысен ик гожъяськыны но кутскиз. 1925-тӥ арын «Гудыриын» «Берпум вуз» нимо нырысетӥ веросэз печатласькиз.

«Тодам ваисько» (???)

Вуоно гожъясьчиосын М. Коноваловен, И. Соловьевен, Ф. Кедровен, И. Курбатовен, Т. Архиповен, И. Гавриловен ӵош мылысь-кыдысь литературно-творческой кружоке пыриськиз.

Берло Игнатий Гаврилов кружокын ужамзэс тодаз вайыса, «Тодам ваисько» книгаяз гожтоз: «Медведев Гриша шер вераськылэ. Нош маке уг ке яра, ымдуръёсыз ик ошко, соку со но шып пукыны уг чида ни:— Самой главноез — улонэз шонер но зэм возьматон. <…> Лыдӟе-ай «Хаджи Муратэз». Солдатъёс постын сыло. Тамак кыско, со но та сярысь вераськем каро. Номыр ик интересноез ӧвӧл кадь, нош книга лыдӟемъя бордаз кыске. Малы озьы? Улэп адямиос возьматэмын. Со бордын ик писательлэн секретэз…».

1928–1929-тӥ аръёсы Г. С. Медведев Шарканысь ШКМ-ен (крестьян егитъёслэн школаенызы) кивалтӥз. Со сяна, кружокъёс усьтӥз, футбол команда кылдытӥз, куасэн бызьылонъёс ортчытъяз.

Татысен Григорий Медведев улонзэ ӟуч дышетӥсен Клавдия Кирилловнаен герӟа. Соослэн Эмилия нылзы вордӥське.

Г. Медведев кузпалэныз Клавдия Кирилловнаен.
1929-тӥ арын Шаркан районысь дышетӥсьёс.
Нырысетӥ радын паллян паласен кыкетӥез Г. С. Медведев
«Выль дунне» (???)

Педтехникумез йылпумъямез бере Медведев трос печатлаське, 4 ар ӵоже солэн пото 25 веросъёсыз но очеркъёсыз. Соос полын чеберлыксыя висъясько «Улонлэн сьӧраз», «Вузкарись Педор», «Лулпыжет», «Лёва Матран», «Яр дурын», «Дэмен» гожтосъёсыз.

Нырысь веросъёсыз пӧлын аспӧртэмлыко луэ «Выль дунне» нимо бадӟым веросэз. Та верос — удмурт литератураын нырысетӥез фантастика амалэн гожтэм произведение.

Валтӥсь героез Кирло 1928-тӥ арын Москвае крестьянъёслэн кенешазы мынэ. Сое отын машина донгытэ. Кирлоез кык сю арлы умме уськыто, кык даур ортчыса, выльысь улӟыто. Сайкам бераз герой аслыз тодмотэм луись дуннеез адӟе. Валаны луэ, малы автор таӵе аспӧртэмлыко амалэз кутэ — кык сю ар ортчыса, улонлэсь тодмантэм воштӥськемзэ возьматон понна.

1930-тӥ арын Г. Медведев веросъёссэ «Ез юбо кырӟа» бичетэн печатла, нош 1932-тӥ арын поттэ «Етӥн штурм» очеркъёсын книгазэ.

«Ез юбо кырӟа» (1930)
«Етӥн штурм» (1932)

Григорий Медведев удмурт литературае чылкак выль сямен гожтэм нырысетӥ бадӟым романэныз — «Лӧзя бесмен» трилогиеныз («Лӧзя бесмен» (1932), «Кыйкар бамын» (1934), «Бадӟым нунал» (1959)) ноку вунонтэм пытьы кельтэ.

Трилогиын туж умой возьматэмын коллективизация вакытысь гуртысь улон, суредамын крестьянъёслэн яркытэсь образъёссы. Автор трос инты висъя гурт калыклэсь улонзэ умоятонлы но выль улонлы пумитъяськись кулакъёсты шараянлы.

Критикъёслэн верамзыя, та нырысетӥез удмурт произведение, кытын быдэсак усьтэмын геройёслэн пушдуннезы: сюлэмшугъяськонъёссы, мылкыдъёссы, выль улонэ кыстӥськемзы.

«Лӧзя бесмен» трилогия

«Лӧзя бесмен» (1932)
«Кыйкар бамын» (1934)
«Бадӟым нунал» (1959)

1934-тӥ арын куартолэзе Г. Медведевез СССР-ысь писательёслэн Союзазы пырто. Егит писатель Д. Корепановен, М. Коноваловен ӵош СССР-ысь писательёслэн нырысетӥ съездазы делегат вал. Отын солы шуд усиз А. М. Горький доры куное ветлыны. Ӟуч писатель соку ваньзылы творческой ужасьёслы мылысь-кыдысь дышетскыны, ужаны дэмлаз. Та ӟеч кылъёслы вазиськыса, Г. Медведев Удмурт пединститутлэн кылъя но литературая факультетаз ӝыт отделение дышетскыны пыре но романэзлэн куинетӥ книгаез борды кутске. Жаляса верано, ачиз улэп дыръя поттыса сое ӧз вутты, «Бадӟым нунал» книгаез потӥз 1959-тӥ арын гинэ.

???
???

1937-тӥ арын куартолэзе Григорий Сергеевич Медведевез, юнме шорысь янгыше уськытыса, тюрьмае пукто. 1938-тӥ арын 20-тӥ шуркынмонэ со улонысь кошке.

Григорий Медведевлэн улон но ужан сюресэз критикъёслэн синмынызы

Солэн куд-ог сыӵе гожъямъёсыз али дыре зэмаса вуттӥзы, малы ке шуоно ваньмыз соос романтикаен пыӵамын но зэмос улонэз лыдэ басьтыса гожтэмын. Нош аслыз Григорий Сергеевичлы улонлэсь сыӵе воштӥськемзэ но азьланьскемзэ адӟыны ӧз кылды ни: кас но мултэс вожъяськись муртъёслэн тыршеменызы сое, троцкист-националист луэ шуыса, 1937-тӥ арын мае арестовать каризы но кыдёкысь Колымае келязы; отысь Берлёх посёлок дорын дано писателез, нокыӵе янгыштэм муртэ, 1938-тӥ арын 17-тӥ ноябре быдтӥзы. Солы 34 арес гинэ вал. 1956-тӥ арын реабилитировать каризы.

Фантастической сюжетэн веросэз пумысь литературовед Ф. К. Ермаков

«Лӧзя бесменэз» лыдӟыку одно ик тодэ лыктэ М. Шолоховлэн «Ӝутэм выльвыл» романэз. Бутаров туж гинэ укша Давыдовлы. <…> Пылька Сандыр но паллян пала шоналтӥськонъёсыныз туж кельше Макар Нагульновлы. Нош огтусоесь ӧвӧл-а Майданниковен шоро-куспо крестьянъёс Эшкабей Ондрей но Нунок Миколай. Чаклалэ, кӧня параллельёс ӟуч литературалэн дано произведениеныз. Но паймымон соиз: «Лӧзя бесмен» «Ӝутэм выльвылэн» огвадес гожтэмын. Кык пӧртэм писательёс, кык пӧртэм суредано интыос — нош кылдытэм типъёссы соослэн одӥг кадесь. Со возьматэ удмурт писательлэсь но кужмо суредась луэмзэ.

А. Г. Шкляев

Саклыктэс чаклалэ!

  1. Кыӵе арын СССР-ысь писательёслэн нырысетӥ съездзы ортче. Съездэ ветлэм удмурт писательёсты вералэ.
  2. Пӧртэм источникъёсыз уже кутыса, тодэ, кыӵе удмурт критиклэн та кылъёсыз: «Григорий Медведев — нырысь ик, кылын суредась, нош ӟеч лэсьтэм суредъёс уг вужмо».
  3. Григорий Медведевлэн «Гудыри» газетын печатласькем нырысетӥ веросэзлэсь нимзэ вералэ.
  4. Тодэ, Григорий Медведевлэн кыӵе произведениысьтыз луо Даур но Кирло геройёс.
  5. Тодады вае, кыӵе тодмо ӟуч романэн ӵошатыны луэ Г. Медведевлэсь «Лӧзя бесмензэ».
  6. «Лӧзя бесмен» трилогилэн люкетъёсызлэсь нимъёссэс вералэ.

Уже кутэм литература

  1. Арекеева С. Т., Фёдорова Л. П., Шкляев А. Г. Удмурт литература: 10-тӥ класслы учебной пособие.— 2-тӥ изд., тупатъямын.— Ижевск: Удмуртия, 2020.– С. 96–112.
  2. Баранова О., Арекеева С. Т. Григорий Сергеевич Медведев (Электронный ресурс). URL: https://f-uffu.udsu.ru/udmurt-writers/grigorij-medvedev
  3. Г. С. Медведевлэн улэмез но творчествоез / дасяз Ф. К. Ермаков.— Ижевск: Удмуртия, 1967.— 28 с.
  4. Ермаков Ф. К. Григорий Сергеевич Медведевлэн творчествоез / Историяя, экономикая, литературая но кылъя удмурт научно-исследовательской институт.— Ижевск: Удмурт книжной издательство, 1963.— 122 с.
  5. Медведев Г. С. Берпум вуз // Гудыри.— 1925.— №107 от 23.07.1925.
  6. Сайт Национальной библиотеки Удмуртской Республики. URL: https://elibrary.unatlib.ru
  7. Шкляев А. Г. Ӵашъем нимъёс: 20–50-тӥ аръёсы репрессия улэ шедем писательёс сярысь: соослэн кылбуръёссы, веросъёссы, пьесаоссы, статьяоссы / редакторез В. С. Уразаева.— Ижевск: Удмуртия, 1995.— С. 338–348.