Николай Семёнович Байтеряков

Литературно-биографической экскурсия

Николай Семёнович Байтеряков

Литературно-биографической экскурсия

Бусыгина Людмила Васильевна
Дышетон удысысь йӧскалык ужпумъёсты
эскеронъя тодос институтысь ӧнерчи

Николай Семёнович Байтеряков

1923–1997

Поэт-фронтовик, удмурт калык поэт, Удмурт Элькунысь кун премилэн лауреатэз, Флор Васильев нимо премилэн нырысетӥ лауреатэз.

Дас вить удмурт но ньыль ӟуч книгаослэн авторзы.

Николай Байтеряков (бур паласез нырысетӥез) анаеныз — Елизавета Ивановнаен, атаеныз — Семён Александровичен, Никита выныныз но Оля сузэреныз.

Николай Байтеряков вордӥськиз 9-тӥ гудырикошконэ 1923-тӥ арын Алнаш ёросысь Варзи-Ятчи черкогуртын.

10 арес дыръяз кулӥз анаез, Елизавета Ивановна. «Удмурт шаерлэн пичи шур дураз мон нырысьсэ кылбурай, куректыса кылбурай — улонысь кошкиз анае. Мыным соку дас арес гинэ вал…»,— вера Н. Байтеряков «Солдатлэн данэз» книгаезлэн азькылаз.

Та кутскон гинэ вал ай, кылбурет дуннее кыстӥськон. Нош кылбураны мылкыдъёсыз солэн бурдъяськиллям школаязы удмурт писательёс Ф. Кедров, И. Дядюков но Т. Шмаков вуылэм бере.

Филипп Кедров
Иван Дядюков
Тимофей Шмаков

«Дась лу!» газетлэн редакторез Т. Шмаков будӥсь писательлы ӟеч дышетӥсь луэ. Пинал гожъясьёслэн ужъёсынызы «Шудо пинал дыр» (1939) бичетэ со Коля Байтеряковлэсь но «8 Март» кылбурзэ пыртэ.

Николай Байтеряков мыло-кыдо дышетскиз школаын, собере — Можга педучилищеын. Отын литературно-творческой кружоке ветлӥз, соку соин тодмо нылпи кылбурчи Филипп Александров кивалтӥз. Но висеменыз дышетсконэз куспетӥ луиз, со дораз берытскиз. Гуртын соку улон капчи ӧй вал. Н. Байтеряков ужаз кирпич лэсьтонын но, кӧльы поттонын но, нюлэс коранын но.

Можга педучилище

1942-тӥ арын май толэзе атаез бӧрсьы ик Н. Байтеряковез фронтэ басьтӥзы. Соос ӧз адӟиське ни, огпол гинэ ог-огзылы гожтэт гожтыса вуттӥзы.

Н. С. Байтеряков наградаосыныз

1942–1944-тӥ аръёсы со фронтын миномётчик но танкист луыса ожмаськиз. Кык пол танкын ӝуаз. Кышкатэк ожмаськемез понна медальёсын, Горд Кизили но II-тӥ степенё Отечественной война орденъёсын пусъемын вал.

Н. С. Байтеряковлэн наградаосыз

Вордскем гуртаз 1947-тӥ арын гинэ вуиз. Собере вал партийной школаын дышетскон аръёс (1949–1951), Алнаш, Можга, Пичи Пурга райкомъёсын ужан вакыт.

Николай Байтеряковлэн 1953-тӥ арын «Кылбуръёс» нимо нырысетӥ книгаез потӥз.

Н. С. Байтеряков. Кылбуръёс (1953)

Ожгар тема Николай Байтеряковлэн удысбураз одӥгез валтӥсез луэ. Кылбурчи гожтэ ортчем война сярысь, сюлэмыз вӧсь луымон вера солэн кышкытлыкез сярысь, тодаз вае бырем эшъёссэ, ожъёс пыр потэм солдат сюресъёссэ. Быдӟым атыкай оже ветлэм мурт, со лулыныз-вирыныз данъя чебер музъем вылысь шудбуро улонэз, вордӥськем шаерзэ но батыр «ас калыксэ».

«Куинь кызьпуос улын»
«Солдатлэн данэз»
«Сьӧд валъёс»
П. В. Ёлкин. «Кылбурчи-фронтовик Н. С. Байтеряков»

Сюлмысь яра но кемалась,
Лэся, бурмиз ини, бурмиз.
Малпан кылиз шур сопала,
Кыл-мадёнлы туннэ пӧрмиз.

Тани вуэ Вормон нунал,
Наградаостэ тон поттӥськод,
Ортчем аръёс, оло, ӧй вал —
Солдат, тон нош лулӟылӥськод.

Тон малпаськод ож сюрестэ,
Тылэн ӵушкам ож аръёстэ.
Тон малпаськод арлы быдэ
Отчы кельтэм матысь эштэ…

Пӧртэм аръёсы Николай Байтеряковлэн пӧртэм кылбур бичетъёсыз печатласькизы.

Кылбурчилэсь кылбуран дуннезэ куинь люкетлы висъяны луоно: ожгарлы сӥзем, граждан но яратон лирика.

«Гуртысь чуръёс»
«Шур ву сямен»
«Сюлэмме кузьмасько» (1966)
«Вдоль серебряной Варзи» (1969)

Николай Семёновичлэн героезлы туж дуно вордӥськем гуртэз, малы ке шуоно отын со нырысь вамышъёссэ лэсьтэ, нырысетӥ кылъёссэ вера, валаны дышетске ӟечез но чеберез. Геройёсыз улонлы шумпото, ӵуказе нуналлы, бадӟым шудлы оско.

«Кикыен вераськон»
«Улонэз гажаса»
«Луысал ке ваньзэ верме»
«Крезь бурд вылын»

Н. Байтеряков удмурт поэзиын тужгес дано луиз аслаз мур лирической кылбуръёсыныз.

Уть монэ, осконэ,
Кылбур чур вордӥське сюлэмысь,
Кисьтӥське жин ошмес кадь вуэн.
Иськемъёс сьӧръёсы иськемысь
Со тонэ кытчы ке но нуэ.

Кырӟась кылбурчи

Николай Байтеряковлэн кылбуръёсызъя ньыльдон пала кырӟанъёс гожтэмын, соос сӥземын яратонлы, вордскем шаерлы но буре ваёнлы.

Тужгес тодмоосыз:

Соос пыремын удмурт крезьгуро лулчеберетлэн зарни шыкысаз.

Кылбур вордӥськон вакытъёсы

Вай, ошмесэ, я вай юо
Мон тынэсьтыд югыт вудэ.
Эшшо бен ку на мон вуо
Анай-атай вордэм юртэ?

…Нош мон ӧй кушты на крезьме,
Бызе, бызе на ошмесэ.
Со мынэсьтым малпанъёсме
Нуэ сьӧраз югыт бусэн.

Николай Байтеряков берло аръёсаз нылпиослы веросъёс но выжыкылъёс гожъяз.

Гожъясьчи дышетӥз инкуазез шӧдыны-валаны, одӥг кылын соин вераськыны.

«Марзан» (1972)
«Мынам ошмесэ» (2011)

Дано кылбурчиез Николай Байтеряковез, улосчизэс буре вайыса, Варзи-Ятчи школаын усьтэмын буре ваён пул.

«…сайкыт уйин инмын
пиштэ мынам кизилие»

Кам шур кутске ошмесысен,
Сюлэмысен кутске кырӟан.
Малы меды калыкысен
Вордскем дорез сюлэм утча?

Пичи шуръёс бызё, васько,
Вузэс сёто соос Камлы.
Шуныт кылбур, ӟечлы оскон
Сётоз тыныд вордэм калык.

Соин, луоз, мурт палысен
Вордскем дорез сюлэм утча.
Кам шур кутске ошмесысен,
Сюлэмысен кутске кырӟан.

«Вай, ошмесэ». Кылъёсыз Н. Байтеряковлэн. Крезьгурез Г. Ганьков но Н. Трубачёв. Быдэстэ Геннадий Ганьков.

Начать с 3:48 Н. Байтеряков. «Крезь бурд вылын». Лыдӟе автор

Начать с 4:41 Н. Байтеряков. «Укноме усьтӥсько». Лыдӟе автор

Начать с 5:29 Н. Байтеряков. «Ворекъяса инкуазь ӟардэ». Лыдӟе автор

Начать с 6:16 Н. Байтеряков. «Вуж кенер, вуж бакча…». Лыдӟе автор

Начать с 6:52 Н. Байтеряков. «Вылысь сётэм чидан…». Лыдӟе автор

Сына йырвизьдэ

  1. Н. Байтеряков — поэт фронтовик. (□ шонер / □ янгыш)
  2. Н. Байтеряков — Кузебай Герд нимо премилэн нырысетӥ лауреатэз. (□ шонер / □ янгыш)
  3. Н. Байтеряков — дас вить удмурт но ньыль ӟуч книгаослэн авторзы. (□ шонер / □ янгыш)
  4. Н. Байтеряков удмурт поэзиын тужгес дано луиз аслаз мур лирической кылбуръёсыныз. (□ шонер / □ янгыш)
  5. Удмурт кылбурчи Флор Васильев будӥсь писательлы ӟеч дышетӥсь луиз. (□ шонер / □ янгыш)
  6. «Марӟан» — Н. Байтеряковлэн нырысетӥ кылбур бичетэз. (□ шонер / □ янгыш)
  7. «Сюлэмысен кутске кырӟан» — Н. Байтеряковлэсь кылбурет дуннезэ эскеронлы сӥзем книга. (□ шонер / □ янгыш)
  8. «Сюлэмысен кутске кырӟан» книгалэн авторез Л. Д. Айтуганова. (□ шонер / □ янгыш)

Уже кутэм литература

  1. Айтуганова Л. Д. Сюлэмысен кутске кырӟан. Николай Байтеряковлэн кылбуръёсыз.— Ижевск: Россиысь Наукаосъя академилэн Урал люкетысьтыз историяя, кылъя но литературая Удмурт институт, 1998.— 191 с.
  2. Байтеряков Н. С. Солдатлэн данэз: Кылбуръёс но поэмаос.— Устинов: Удмуртия, 1987.— 112 с.
  3. Пантелеева В. Г., Фёдорова Л. П., Шкляев А. Г. Удмурт литература: 11-тӥ класслы учебник.— 2-тӥ изд., тупатъямын.— Ижевск: Удмуртия, 2020.– С. 43–54.
  4. Сайт Национальной библиотеки Удмуртской Республики. URL: https://unatlib.ru
  5. Сайт Удмуртского республиканского музея изобразительных искусств. URL: https://urmii.ru/index.php/kollektsii-muzeya/85-khudozhniki-udmurtii/166-elkin-petr-vasilevich-rod-1946