Ашальчи Оки

Литературно-биографической экскурсия

Ашальчи Оки
(Акулина Григорьевна Векшина)

Литературно-биографической экскурсия

Бусыгина Людмила Васильевна
Дышетон удысысь йӧскалык ужпумъёсты
эскеронъя тодос институтысь ӧнерчи

Ашальчи Оки
(Акулина Григорьевна Векшина)

1898–1973

Нырысетӥез удмурт нылкышно кылбурчи но эмчи

Кушем ним карыса Лина Григорьевна басьтӥз аслыз
удмурт бусыосын будӥсь ненег-льӧль сяськалэсь нимзэ

Тон юад мынэсьтым:
— Марлы бен кылбуръёс гожъяськод,
Чик юнме кужымдэ быдтӥськод?

Бен юад-а, юад-а, эше,
Бусыын ӵуж кисьмам сезьылэсь,
Марлы со уй-нунал ӵаштыртэ,
Уй-нунал ас понназ вераське?

Шур вулэсь нош юад-а, эше,
Марлы со дугдылтэк жальыртэ,
Дугдылтэк ас понназ куаретэ?

Уӵыед но тулыс садъёсын
Марлы бен ӝыт-ӵукен весь чирдэ
— Тон юад-а сое?

Нырысетӥез удмурт нылкышно-поэтесса Ашальчи Оки вордӥськиз 1898-тӥ арын 4-тӥ оштолэзе Грах ёросысь Ускы (Кузебаево) гуртын.

Грахысь кыкклассъем школаез но Карлыган черкогуртысь Центральной удмурт школаез йылпумъямез бере, Елабугаысь епархиальной училищеын дышетӥсьлэсь дипломзэ басьтэ. Озьы дас куать аресъем Акулина дышетӥсь луыса пӧртэм гуртъёсысь школаосын ужа.

1919-тӥ арын А. Векшина Кузон университетлэн рабфаказ дышетскыса, ӝоген медициная факультетаз пыре.

Кузонысь университет XX-тӥ даурлэн кутсконаз

1928-тӥ арысен быдэс улонзэ син эмъясь врач луыса ужа: нырысь Юкаменскын (1928–1932), собере Алнашын (1932–1973).

Ашальчи Оки Казаньын ӵош дышетскем матысь эшъёсыныз. Паллянысен кыкетӥез — А. К. Борисова ( Т. К. Борисовлэн сузэрез), ньылетӥез — О. К. Андреева (Карлыган школаез кылдытӥсь К. А. Андреевлэн нылыз), витетӥез — Ашальчи Оки.

Аслаз ужамез сярысь Акулина Григорьевна тазьы вералляз: «Монэ ведь Алнаш районын котькуд пуны тодма. Кудаз гинэ азбаре уд пыриськы, одӥг пуны но шорам уг уты».

Ашальчи Окилэн син висёнъёсты эмъян сярысь книгаосыз
Кузпалъёс Алнашысь агроном Иван Иванович Карачёв
но син эмъясь врач Лина Григорьевна Векшина

1925-тӥ арын «Сюрес дурын» кылбур бичетэз потэ. Сое 2000 экземпляр тиражен поттэ Москваысь Центриздат, удмурт правительстволэн кивалтӥсьёсызлэн И. А. Наговицынлэн, Т. К. Борисовлэн, А. С. Медведевлэн но Кузебай Герд кылбурчилэн ӵектэмзыя.

Ӝоген Кузебай Герд Ашальчи Окилэсь кылбуръёссэ ӟуч кылэ берыктэ но 1928-тӥ арын «О чём поёт вотячка» нимын бичетсэ поттэ.

1920-тӥ аръёслэн пумзы:
литератураысь кошкон

1928-тӥ арын Ашальчи Оки берпуметӥ кылбурзэ гожтэ

Кылы быре

Одӥг вамыш азьлань,
Одӥг вамыш берлань…
Милям гуртын Педор Насьта
Нюкын лушкем арак пӧзьтэ:
Насьта кадьёс уно вань —
Одӥг вамыш берлань…
Тани тодам лыктэ Малань:
Малань ветлэ ӟуч арняе
Газет лыдӟын читальняе —
Одӥг вамыш азьлань…
Малань сяна, нылъёс уно…
Горей Окля висьны кутске,
Туно доры котьку ваське —
Одӥг вамыш берлань…
Куӵогуртын урод черен…
Ӵок, ӵок! Уг вера ни…
Кылы быре
Йыры курен…

1933-тӥ арын Ашальчи Оки Кузебай Гердэн кусэп воземез понна пытсэтэ шеде (Кузебай Герд «СОФИН» (Союз освобождения финских народов) огазеяськонэз кылдытон пумысен янгыше уськытэмын вал). Куинь толэзь пукыса, Ашальчи Оки пытсэтысь потэ. Но репресиос уг дугдо. Гожъяськонлэсь кылбурчи куштӥськоно луэ.

Мар малпасько но шӧдӥсько, со сярысь гожъяны уг быгатӥськы, нош пӧяськыса гожъяме уг поты; кыӵе мон шумпотӥсько, мынам йыркуръяськонтэм уже — медицина — вань шуыса. Удмурт литература бырон калэ вуттэмын, ваньмыз быгатӥсь но самой умоесь кужымъёс зӥбемын, кылё ӧвӧлтэм писатель нергеос гинэ. Литератураысь палэнтӥськонэз умоен лыдъясько, мон понна со туж секыт но сюлэмез вӧсь карись малпан ке но.

Ашальчи Оки

Кузнецов Н. С. Из мрака… 64-тӥ б.

Кузнецов Н. С. Из мрака… / Шимес пеймытысь

1932-тӥ арын «Кузебай Гердлэн ужезъя» янгыше уськыто Лина Григорьевналэсь агайзэ но, Иван Григорьевич Векшинэз. Литератураын тодмо Айво Иви нимын.

Со «Анае гурзэ эстэм, дыр, но…» тодмо удмурт кырӟанлэн авторез луэ.

Ньыль ар ссылкаын улыса, Иван Григорьевич но гожъяськон удысэ ӧз берытскы ни.

Тани соос, одӥг семьяын будэм кык гожъясьчиос — Ашальчи Оки (кыкетӥ радын шораз) но Айво Иви (кыкетӥ радын паллянысез).

1941-тӥ арын 24-тӥ инвожое Л. Г. Векшина кошке Быдӟым Атыкай ожгаре.

Паймоно кадь, шуэ литературовед А. Ермолаев, но ожгаре басьтэмзылы со паймымон шумпотӥз: солы советской ожчиосты эмъяны оско ик вылэм шуыса.

Быдӟым Атыкай ожгар сюресъёсыз ортчыса, Л. Г. Векшина Алнашын син эмъясь врач луыса ужаз.

1956-тӥ арын 1-тӥ оштолэзе Л. Г. Векшина кылбурчиез реабилитировать каро.

1957-тӥ арын 5-тӥ шуркынмонэ пусъё «Заслуженный врач УАССР» сӥё-дано нимын.

КПСС-лэн ХХ-тӥ съездэз бере Ашальчи Оки литературае берытскыны малпа ик вылэм, но ачиз ик шуэм:

«Нош ӧжыт бергес ӧвӧл-а? Скрипач 25 ар кияз смычоксэ ӧз ке басья, со умой шудыны быгатоз-а? Конечно, уз! Солы выльысь дышетсконо. Диалектикалэн законэз чурыт: улон огинтыяз уг сылы, азьлань мынэ».

Аркадий Клабуковлы гожтэтысьтыз.

Ашальчи Окилэн пӧртэм аръёсы потэм книгаосыз

Котьмар шу но, мукет калыкъёслэн Ашальчизы ӧвӧл! Шонерзэ верано ке, Ашальчи Оки удмурт кылыклы (литератураез уг вераськы) одӥг кырӟанэныз классик луиз. Ведь калыклэн визьмаз кылён понна, одно ик зӧкесь томъёс гожтоно ӧвӧл…

Г. Д. Красильников — Ашальчи Окилы. 1968 ар, 29 март
Ашальчи Оки но Геннадий Красильников
(1961-тӥ ар)

Ашальчи Окилэн улон но ужан сюресэз критикъёслэн синмынызы

Ашальчи Оки вместе с Гердом шла по пути, ведущему к подлинно национальной литературе, приняв национальные традиции и применив к ним достижения мировой литературы. То, что ее поэзия не могла вступить в следующую фазу, большая потеря для литературы ее народа.

Петер Домокош

Зэм, со ӧжыт гожтӥз. Озьы ке но, луэ шат кылбур творчествоез лыдын лыдъяны? Кудӥз кылбурчиосмы туж трос ке но гожъязы, вунэмын ини. Соослэсь чуръёссэс гинэ ӧвӧл, нимъёссэс но тодэ вайыны секыт ини. Ашальчи Окилэн нош котькуд кылбурез али но жингыр вазе. Али но егит лыдӟисьёслэн сюлмазы ик йӧтэ.

А. А. Ермолаев

Удмурт кылбурчилы туж тупалоз кадь потэ Анна Ахматовалэн кылбуръёсыз сярысь Николай Недоброволэн верамез. Со шуиз: та поэтессалэн кылбуретаз, пе, шудтэм яратон кылбуран амаллы пӧрмытэмын. Мугез нош талэн одӥг: со — пиосмурт кылбурчи ӧвӧл, нылкышно кылбурчи … Оло, зэмзэ но, та ик луэ нылкышно гожъясьёслэн дунне шоры учкон но улон-вылонэз валан пӧртэмлыксы.

Л. П. Фёдорова

Ашальчи Окиез буре вайыса

Ашальчи Окилэн Алнаш черкогуртын улэм корказ усьтэм музей
Грах черкогуртысь Ашальчи Оки нимо шаертодонъя музейын
С. Виноградов. Ашальчи Оки

Тодэ, кытын вань Ашальчи Окилы таӵе синпелет.

Юанъёслы валэктонъёс сётэ.

  1. Ашальчи Окилэсь «Сюрес дурын» кылбур бичетэзлэсь потэм арзэ вералэ.
  2. Ашальчи Окилэсь ӟуч кылын потэм кылбур бичетэзлэсь нимзэ но кылбуръёссэ берыктӥсезлэсь нимзэ тодэ.
  3. Тодэ, кыӵе жанрен произведениос гожъяз Ашальчи Оки берло аръёсаз.
  4. Вералэ, кыӵе удмурт гожъясьчи Ашальчи Оки сярысь тазьы шуиз: «одӥг кырӟанэныз классик луиз».
  5. «Анае гурзэ эстэм, дыр, но…» тодмо удмурт кырӟанлэн авторез сярысь вералэ.

Уже кутэм литература

  1. Арекеева С. Т., Фёдорова Л. П., Шкляев А. Г. Удмурт литература: 10-тӥ класслы учебник.— 2-тӥ изд., туп. (Удмуртская литература. 10 класс.— 2 изд., исправленное).— Ижевск: Удмуртия, 2020.— С. 60–67.
  2. Домокош П. История удмуртской литературы / [перевод с венгерского В. Васовчик].— Ижевск: Удмуртия, 1993.— С. 249–260
  3. Федорова Л. П. Удмурт нылкышно кылбуретлэн тулкымъёсыз.— Ижевск: Удмуртия, 2007.— С. 24–49.
  4. Ашальчи Оки: Акилина Григорьевна Векшина: улэмез но творчествоез: дышетӥсьёслы но дышетскисьёслы пособие / авт.-сост. А. А. Ермолаев.— Ижевск: Удмуртия, 1998.— 47 с.
  5. Сайт Национальной библиотеки Удмуртской Республики. URL https://unatlib.ru
  6. Сайт Удмуртского республиканского музея изобразительных искусств. URL: https://urmii.ru/index.php/kollektsii-muzeya/85-khudozhniki-udmurtii/174-vinogradov-semen-nikolaevich-rod-1936