Александр Фёдорович Шутов

Научно-биографической экскурсия

Александр Фёдорович Шутов

Научно-биографической экскурсия

Костина Ксенья Георгиевна
Дышетон удысысь йӧскалык ужпумъёсты
эскеронъя тодос институтысь ӧнерчи

Александр Фёдорович Шутов

18.05.1947

  • Кылосбур тодосъя доктор
  • Удмурт кун университетысь ветеран
  • Удмурт Элькунысь Калыкез дышетонъя удысысь дано ужась

Вордскиз 18-тӥ куартолэзе 1947-тӥ арын Можга ёросысь Бадӟым Сибы гуртын.

Можга черкогуртын шор ёзо школаын но Можга карысь педучилищеын дышетскиз. Собере Кватчи школаын дышетӥсь луыса ужаз.

1966–1968-тӥ аръёсы армиын служить кариз.

1968–1970-тӥ аръёсы Вуж Юбера школаын дышетӥсь луыса ужаз.

1970–1975-тӥ аръёсы Удмурт кун университетлэн филологи факультетэзлэн удмурт ёзэтаз дышетскиз.

Дышетскон вакытаз умой дышетскемез но тодослыко ужзэ умой нуэмез вуттӥзы А. Ф. Шутовез Мускоысь Кылтодонъя институтэ.

Аспирантураын дышетскыкуз, удмурт кыллэсь синтаксиссэ эскериз.

Бадӟым Сибы гуртлэн тусыз
Удмурт кун университетлэн кылосбуръя ёзэтаз дышетскисьёс (паллянысен буре):
Галина Дюпина, Александр Шутов, Раиса Головкина (1973-тӥ ар)

1980-тӥ арын «Абсолютные обороты в удмуртском языке» темая кылосбур тодосъя кандидатской диссертацизэ утиз.

Тодослыко кивалтӥсез — Б. А. Серебренников.

А. Ф. Шутовлэн дисертациезлы автореферат
Б. А. Серебренников
(1915–1989)
«Гипотаксис в удмуртсокм языке» (1999)

1979-тӥ арысен Удмурт кун университетын ужаз. 2010-тӥ арозь удмурт кылъя, сое дышетон амалъёсъя кафедраен кивалтӥз.

2002-тӥ арын «Пути развития гипотактических отношений в удмуртском языке» темая кылосбур тодосъя докторской диссертацизэ утиз.

Тодослыко ужын учкемын сложноподчинённой предложе-ниослэн, пӧртэм пумо вӧлскетъёслэн кылын кутӥськемзы.

Удмурт кылъя но литературая кафедра (1980-тӥ аръёс)
Пуко (палянысен буре): Юсаева Н. А., Яшин Д. А., Шушакова Г. Н., Тараканов И. В., Семенова А. Н.
Сыло (палянысен буре): Карпушина Л. Д., Яшина Р. И., Зуева А. С.
Сыло (палянысен буре): Ушаков Г. А., Шутов А. Ф., Кельмаков В. К, Соколов С. В.

Александр Фёдоровичлэн тодэ ваёнъёсыз

Ньыль арзэ Сибыын дышетски. Дышетски со юртын, кудаз Вера Васильевна Толстая дышетӥз. Али отын музей ини.

Тодам вайисько нырысетӥ дышетӥсьме — Нина Николаевна Медведеваез. Со туж сюлмаське вал, чебер мед гожъяськомы шуыса. Чылкыт гожъяськонъя урокъёсын мынэсьтым тетрадьме ӵемысь ушъяса возьматъялляз.

Студент аръёс — со вунонтэм вакыт. Вал шулдыръяськонъёс но, сюлмаськытӥсь макеос но. Соку пӧртэм ужрадъёс ортчылӥзы. Концертъёсын но поталлямы. Валя Ившина гитараен шудылӥз, Аля Алашеева — баянэн, мон — арганэн. Пӧртэм сценкаос пуктылӥм. Гужемъёссэ стройотрядъёсын ужай. Алнашысь Шор Утчанын скал гид лэсьтӥм, Кизнерысь Короленко посёлокын школа ӝутӥм.

Александр Фёдорович сярысь тодэ ваён

Классын Саша висъяськылӥз ӝужыт мугорыныз но котькуд уроклы пыр-поч дасяськеменыз. Дышетскиз со ваньмызлэсь умой. Тужгес но паймытъя вал монэ со удмурт кылъя урокын. Укыр вольыт вераськылӥз, янгышъёстэк гожъяз. Мон, со сьӧры уйиськись мурт, удмурт кылъя урокъёсын бездыт адӟиськылӥ. Малпалляз-а соку Шутов, вордскем кылыз бордын ужано луоз шуыса? Ӧз. Со малпалляз суредась луон яке немец кылэз вольыт тодон сярысь. Со вакытэ уноез дышетскисьёс ГДР-ысь нылъёсын-пиосын гожъяськылӥзы. Ми но Шутовен «эшъяськон выж» усьтӥмы. Малы тае пусйисько. Немец кылъя зол дышетӥсьёсмы вал. Одӥгез ож бусыын немец кылысь ӟуче берыктӥсь вылэм. Мукетыз 7-тӥ классын кружок радъяз, театр выллем кылдытӥз, отын выжыкылысь рольёсты ми немец кылын шудылӥм.

Г. Юсаев

Шутов А. Ф. Пыд азьзэ учкытэк уз вамышты / А. Ф. Шутов;
гожтӥз Г. Юсаев // Удмурт дунне.— 2004.— 23 янв.— С. 6, 11.

Александр Фёдорович — анай кылзэс ляб тодӥсь пиналъёслы удмурт кыллы но литературалы дышетон программалэн но пособилэн соавторез

Анай кылзэс ляб тодӥсь пиналъёсты удмурт кыллы но литературалы дышетон программаос. 5–9-тӥ классъёслы / Дасязы А. Н. Журавлёва, А. Ф. Шутов (Удмурт кылъя программа); В. Г. Пантелеева, Л. П. Фёдорова, С. Т. Арекеева, огъя редакциез В. Г. Пантелеевалэн (Удмурт литературая программа).— Ижевск: Удмуртия, 2006.— 40 б.

Анай кыл. 8-тӥ класс: Удмурт кылэз ляб тодӥсь пиналъёслы учебной пособие / Дасязы А. Н. Журавлёва, В. Г. Пантелеева, А. Ф. Шутов.— Ижевск: Удмуртия, 2009.— 248 б.

Уже кутэм литература

  1. Официальный сайт Архивной службы Удмуртии / URL: http://gasur.ru (дата обращения: 24.11.2022).
  2. Официальный сайт Национальной библиотеки Удмуртской Республики / URL: https://unatlib.ru (дата обращения: 21.10.2022)
  3. Христолюбова Л. С. Ученые-удмурты: биобиблиографический справочник / Л. С. Христолюбова.— Ижевск: Удмуртия, 1997.— 860 с.
  4. Шутов А. Ф. Пыд азьзэ учкытэк уз вамышты / А. Ф. Шутов; гожтӥз Г. Юсаев // Удмурт дунне.— 2004.— 23 янв.— С. 6, 11.

Сына йырвизьдэ

  1. Шутов А. Ф. вордскиз Можга ёросысь Кватчи гуртын. (□ шонер / □ янгыш)
  2. Шутов А. Ф. Удмурт кун университетлэн филологи факультетэзлэн удмурт ёзэтаз дышетскиз. (□ шонер / □ янгыш)
  3. Аспирантураын дышетскыкуз, Шутов А. Ф. удмурт кыллэсь морфологизэ эскериз. (□ шонер / □ янгыш)
  4. Школаын дышетскыкуз, Шутов А. Ф. малпалляз суредась яке немец кылэз вольыт тодон сярысь. (□ шонер / □ янгыш)
  5. Шутов А. Ф. анай кылзэс ляб тодӥсь пиналъёслы учебной пособие дасян бордын тыршиз. (□ шонер / □ янгыш)