Тамара Ивановна Тепляшина

Научно-биографической экскурсия

Тамара Ивановна Тепляшина

Научно-биографической экскурсия

Костина Ксенья Георгиевна
Дышетон удысысь йӧскалык ужпумъёсты
эскеронъя тодос институтысь ӧнерчи

Тамара Ивановна Тепляшина

09.03.1924–24.12.2014

Удмурт но финн-угор филологи удысысь дано тодосчи, тодмо кылчи, кылосбур тодосъя кандидат, Удмурт Элькунысь наукаын сиё-дано ужась

Тамара Ивановна Тепляшина вордӥськиз 9-тӥ южтолэзе 1924-тӥ арын туала Дэбес ёросысь Пичи Кизьна гуртын крестьян семьяын.

1931–1934-тӥ аръёсы гуртысьтызы покчи ёзо школаын дышетскиз.

1934–1937-тӥ аръёсы Усть-Лем гуртысь неполной средней школаын дышетскиз.

Собере Ижкаре улыны лыктӥз, «Школа рабочей молодёжи»-ын дышетскиз.

1941-тӥ арын Удмурт педагогической институтлэн литературной ёзэтаз дышетскыны пыриз.

Удмурт педагогической институт

1942-тӥ арысен 1946-тӥ арозь Быдӟым Атыкай ожгарын тушмонъёсын нюръяськиз.

Со Тихоокеанской флотлэн (Дальний Восток) 28-тӥ береговой оборонаезлэн бригадаяз но Северной флотлэн (Карельский фронт) Противовоздушной оборонаезлэн 361-тӥ зенитно-артиллерийской полказ зенитчица вал.

Тамара Ивановнаен ӵош Северной флотэ Удмуртиысь 480 пала кышномуртъёс келямын вал.

Туспуктэмын Т. И. Тепляшина пуке. Вӧзаз Любовь Алексеевна Овчинникова сылэ. Л. А. Овчинникова но Т. И. Тепляшина ӵошен тушмонлы пумит нюръяськизы

Тамара Ивановна Тепляшина (пуке) но
Любовь Алексеевна Овчинникова (сылэ)

Милемыз буш степь пумитаз. Отын 40–50 градус кезьыт вал, буранъёс но тӧлъёс пелляськизы. Буш казармамы йӧ кадь кезьыт вал, ӧз эстӥськы. Отчы куро ваизы, борддоръёс кузя вӧлдӥзы, куро вылын изёды, шуизы. Кынмонлэсь утиськон понна, ӝыт ваньмы ог-огмы доры матэгес выдылӥмы.

Фронтэ келян сярысь ивор 8-тӥ южтолэзе вуиз. Нылъёс та иворлы шумпотӥзы — кунэз утён понна, тушмонэн нюръяськыны дыр вуиз.

Т. И. Тепляшиналэн тодэ ваёнъёсысьтыз

Быдӟым Атыкай ожгарын нюръяськемез понна, Тамара Ивановна таӵе медальёсын пусъемын:

  1. «За боевые заслуги»
  2. «За оборону Советского Заполярья»
  3. «За победу над Японией»
  4. «За победу над Германией в Великой Отечественной войне 1941–1945 гг.»

2000-тӥ арын Тамара Ивановна Вормон Парадэ пыриськиз.

1949-тӥ арын Ленинградысь кун университетлэн восточной факультетысьтыз финн-угор ёзэтсэ йылпумъяз.

1949-тӥ арын Удмурт АССР-ысь Удмурт научно-исследовательской институтын тодосъя ӧнерчи луыса ужаз.

1952–1955-тӥ аръёсы СССР-ысь Тодосъя академилэн Кылтодонъя институтэзлэн финн-угор кылъёсъя ёзэтаз аспирантураын дышетскиз.

1955-тӥ арын «Тыловайский диалект удмуртского языка» темая кылосбур тодосъя кандидатской диссертацизэ утиз. Ужаз Ыты шур котырын улӥсь удмуртъёслэсь вераськон манерзэс эскериз.

Кивалтӥсез — Василий Ильич Лыткин (Илля Вась).

Аспирантка Тепляшина Т. И. ужан ӝӧк сьӧраз (1953-тӥ ар)
Василий Ильич Лыткин (1895–1981)

1956–1959-тӥ аръёсы Рязаньысь педагогической институтлэн ӟуч кылъя кафедраяз ассистент луыса ужаз.

1959–1979-тӥ аръёсы СССР-ысь Кылтодонъя институтлэн финн-угор кылъёсъя ёзэтаз научной сотрудник луыса ужаз.

Тамара Ивановналэн научной ужез удмурт кыллэн диалектологиеныз, исторической фонетикаеныз, ономастикаеныз, лексикологиеныз но лексикографиеныз герӟаськемын. Куд-ог ужъёсыз антропонимикаез но топонимикаез эскеронлы сӥземын.

Бадӟым саклык висъяське уйпал но шор вераськетъёсты, бесерман кылэз эскеронлы.

Ленинградысь кун университет
Рязаньысь педагогической институт

Тамара Ивановна — бесерман кылэз эскерись

«Язык бесермян» (1970)

1970-тӥ арын «Язык бесермян» нимо монография поттэмын.

Тодослыко уж 1950–1960-тӥ аръёсы пӧртэм бесерманъёслэсь люкам материал но азьвыл гожтэм тодослыко ужъёс вылэ пыкъяськыса гожтэмын.

Монографиын бесерман наречилэн фонетикая но морфологияя аспӧртэмлыкъёсыз эскерисько. Соос нырысетӥзэ удмурт кыллэн мукет диалектъёсыныз но тюрк кылъёсын ӵошатыса возьматэмын.

Тодосчи монографиын таӵе огъянэ вуэ: бесерман калык булгар калыклэсь пӧрмемын.

Тамара Ивановна — ономастикаез но письменной памятникъёсты эскерись

«Памятники удмуртской письменности XVIII века» (1965)
«Антропонимические модели пермских языков» (1978)

Уже кутэм литература

  1. Максимов С. А. О перспективах создания словаря бесермянского наречия удмуртского языка (по материалам Т. И. Тепляшиной) / С. А. Максимов // Вестник Удмуртского университета. Серия История и филология.— 2020.— Т. 30.— №2.— С. 197–203.
  2. Официальный сайт Архивной службы Удмуртии / URL: gasur.ru (дата обращения: 24.11.2021).
  3. Тепляшина Т. И. Мы были счастливы возможности бить фашистов / URL: http://udman.ru/ru/press-center/news/novosti/my-byli-schastlivy-vozmozhnosti-bit-fashistov-teplyashina-tamara-ivanovna-1924-2014/ (дата обращения: 20.06.2021).

Сына йырвизьдэ

  1. Удмуртилэн кыӵе ёросаз вордскиз Тамара Ивановна Тепляшина?
  2. Кыӵе карын 1949-тӥ арын Т. И. Тепляшина университетлэн восточной факультетысьтыз финн-угор ёзэтсэ йылпумъяз?
  3. Кыӵе карын 1956–1959-тӥ аръёсы Т. И. Тепляшина педагогической институтлэн ӟуч кылъя кафедраяз ассистент луыса ужаз?
  4. Кыӵе шур котырын улӥсь удмуртъёслэн вераськон манерзы эскеремын Т. И. Тепляшиналэн «Тыловайский диалект удмуртского языка» кылосбур тодосъя кандидатской диссертацияз?
  5. Т. И. Тепляшиналэсь кыӵе тодослыко ужъёссэ тӥ тодӥськоды? Кыӵе соослэн пуштроссы?