Иван Васильевич Тараканов

Научно-биографической экскурсия

Иван Васильевич Тараканов

Научно-биографической экскурсия

Костина Ксенья Георгиевна
Дышетон удысысь йӧскалык ужпумъёсты
эскеронъя тодос институтысь ӧнерчи

Иван Васильевич Тараканов

02.07.1928–09.03.2015

Удмурт но финно-угор филологи удысысь дано тодосчи, тодмо кылчи, кылосбур тодосъя доктор, профессор, Россия Федерациысь но Удмурт АССР-ысь наукаын сӥё-дано ужась, Удмурт Элькунысь Тодослыко Академиысь академик

Вордскиз 2-тӥ пӧсьтолэзе 1928-тӥ арын ТАССР-ысь (али Татарстан) Бавлы ёросысь удмурт Урсы (Покровский Урустамак) гуртын крестьян семьяын.

Атаез, Василий Семёнович, крезьчи вылэм.

Иван Васильевич, 1944-тӥ арын гуртысьтыз шор ёзо школаез йылпумъямез бере, та школае ик пичи классъёсысь нылпиосты дышетыны кельтэмын.

И. В. Тараканов атаеныз
Урсыгурт котырысь вырйылъёс
Урсыгурт котырысь вырйылъёс
Урсыгурт котырысь вырйылъёс
Урсыгурт котырысь вырйылъёс

1944–1948-тӥ аръёсы Бугульмаысь педагогической училищеын заочной амалэн дышетскиз.

1948–1952-тӥ аръёсы Удмурт кун педагогической институтлэн удмурт ёзэтаз дышетскиз.

1952–1953-тӥ аръёсы Бавлыысь шор ёзо школаын ӟуч кылъя но литературая дышетӥсь луыса ужаз.

1953–1958-тӥ аръёсы Тарту (Эстония) университетысь аспирантураын дышетскиз.

1953–1960-тӥ аръёсы Удмурт научно-исследовательской институтын научной сотрудник луыса ужаз.

Бугульмаысь педучилище
УдНИИ туннэ нуналъёсы

1960-тӥ арысен Удмурт кун педагогической институтын ужаз:

1960–1964-тӥ аръёсы — удмурт кылъя но литературая кафедраысь старший преподаватель;

1964-тӥ арысен — удмурт кылъя но литературая кафедраысь доцент;

1967–1972-тӥ, 1974–1983-тӥ аръёсы — удмурт кылъя но литературая кафедраен кивалтӥсь;

1987–1988-тӥ аръёсы — Удмурт кун университетысь филологической ёзэтлэн деканэз;

1988-тӥ арысен — профессор.

1959-тӥ арын «Фонетические особенности бавлинского диалекта удмуртского языка (в свете экспериментальных данных)» темая кылосбур тодосъя кандидатской диссертацизэ утиз (кивалтӥсез Пауль Аристэ).

1986-тӥ арын «Удмуртско-тюркские языковые контакты» темая кылосбур тодосъя докторской диссертацизэ утиз.

Удмурт кун педагогической институт 1950-тӥ аръёсы

1988–1990-тӥ аръёсы Удмурт научно-исследовательской институтысь кылъя ёзэтэн кивалтӥз.

1992–1995-тӥ аръёсы Удмурт кун университетысь огъя но финн-угор кылтодонъя кафедраен кивалтӥз.

1992–2013-тӥ аръёсы Удмурт кун университетысь кандидатской но докторской диссертациосты утёнъя Диссертационной советлэн председателез вал.

1995–2005-тӥ аръёсы Удмурт кун университетысь туала удмурт кылъя но сое дышетон методикая кафедраен кивалтӥз.

2005–2015-тӥ аръёсы — Удмурт кун университетысь туала удмурт кылъя но сое дышетон методикая кафедраысь профессор.

2015-тӥ арын Иван Васильевич улонысь кошкиз.

Загуляева Б. Ш., Тараканов И. В. но Ушаков Г. А.
Удмурт научно-исследовательской институтын конференциын (1984-тӥ ар)
Пуко: И. В. Тараканов, Р. И. Яшина
Сыло: Д. А. Яшин, В. К. Кельмаков

Иван Васильевичлэн 240-лэсь ятыр научной ужъёсыз. Соос пӧлысь дас одӥгез — монографиос.

«Заимствованная лексика
в удмуртском языке: Удмуртско-тюркские языковые контакты» (1982)

Заимствованная лексика в удмуртском языке: Удмуртско-тюркские языковые контакты

Автор удмурт кылысь асэстэм кылъёсты эскере. Адямилэсь котырзэ но пӧртэм выросъёссэ нимась кылъёс удмурт кылэ бускель калыкъёслэн кылъёсысьтызы пыремын. Со кылъёс авторен куинь туркымлы висъямын: индоиран, огъя финн-угор но огъя перм асэстэмъёс.

Со сяна, тодосчи бигер но башкир кылысь удмурт асэстэмъёсты эскере.

«Иноязычная лексика в современном удмуртском языке» (1981)

Иноязычная лексика в современном удмуртском языке»

Дышетон пособиын автор удмурт кылысь асэстэмъёсын валтӥсь пластъёсты висъя: индоиран, вашкала тюрк, булгар, бигер асэстэмъёс. Котькуд пластъя удмурт кылъёс гожтэмын.

«Удмуртско-тюркские языковые взаимосвязи: Теория и словарь» (1993)

Удмуртско-тюркские языковые взаимосвязи: Теория и словарь

Монографие Волга но Кама котырысь кылъёсъя ивортодэт, удмурт кылысь тюрк асэстэмъёсын кыллюкам пыртэмын.

«Удмурт лексикая очеркъёс» (1971)

Удмурт лексикая очеркъёс

Книгаын удмурт кыллэн словарной составез котыр ласянь эскеремын. Висъямын омонимъёс, паронимъёс, антонимъёс, синонимъёс, асэстэм кылъёс, выль но вуж кылъёс, фразеологизмъёс но мукет.

«Вопросы диалектологии и лексикологии удмуртского языка» (1990)

Вопросы диалектологии и лексикологии удмуртского языка

Сборнике удмурт кыллэсь лексикологизэ но диалектъёсты эскеронлы сӥзем статьяос пыртэмын.

«Исследования и размышления
об удмуртском языке» (1998)

Исследования и размышления об удмуртском языке

Книгае И. В. Таракановлэн пӧртэм аръёсы удмурт кылъя гожтэм статьяосыз но малпанъёсыз люкамын.

«Удмуртский язык:
становление и развитие» (2007)

Удмуртский язык: становление и развитие

Сборнике пӧртэм пумо статьяос пыртэмын: туала удмурт кыллэн графикаезъя, орфографиезъя но терминологической лексикаезъя.

Одӥг люкетэз тодмо финн-угор тодосчиослы сӥземын.

Иван Васильевич школаослы удмурт кылъя учебникъёс гожъян бордын тыршиз

«Удмурт кыл. 5–6 классъёслы» (1972)

1972-тӥ арын «Удмурт кыл. 5–6 классъёслы» учебникез потӥз. Соавторъёсыз — Г. Н. Никольская, А. А. Поздеева но Р. И. Яшина.

«Удмурт кыл. 6–7 классъёслы» (1992)

1992-тӥ арын «Удмурт кыл. 6–7 классъёслы» учебникез потӥз. Соавторез — Г. Н. Никольская.

Удмурт кун педагогической институтын но Удмурт кун университетын ужакуз, И. В. Тараканов кылтодонъя, диалектологияя, исторической фонетикая но морфологияя, мукет спецкурсъёсъя лекциос лыдӟиз. Трос пол педагогической но диалектологической практикаосын кивалтӥз.

Иван Васильевич Тараканов — дышетӥсь но мерлыко уж нуись

1970–1995-тӥ аръёсы – Калыккуспо финн-угор конгрессъёсты радъянъя комиссилэн ёзчиез.

1965–1995-тӥ аръёсы – «Советское финно-угроведение» (али Linguistica Uralica) журналлэн редколлегиезлэн ёзчиез.

10 аръёс пала Мари кун университетысь Диссертационной советлэн ёзчиез вал.

16 аръёс пала Удмурт АССР-ысь Дышетонъя министерство бордысь Педагогической огазеяськонэн кивалтӥз.

«Советское финно-угроведение» журнал
«Linguistica Uralica» журнал

Иван Васильевичлэн куспетӥ кельтэм, йылаз-пумаз вуттымтэ ужез, аръёс ортчыса, поттэмын одӥгеныз дышетскисеныз, кылосбур тодосъя докторен, профессорен Н. В. Кондратьеваен. «Удмурт кыллэн исторической лексикологиезъя ужпумъёс» (2019) монография пусъемын Эстониысь Тодосъя но дышетонъя министерстволэн ӵыжы-выжы луись калыкъёслэн программазылэн тодосъя йӧскалык премиеныз.

«Удмурт кыллэн исторической лексикологиезъя ужпумъёс» (2019)

Иван Васильевич Тараканов

  • Удмурт АССР-ысь наукаын сӥё-дано ужась (1989)
  • Росси Федерациысь наукаын сӥё-дано ужась (1997)
  • Кузебай Герд нимо йӧскалык премилэн лауреатэз (1997)
  • Информатика наукая Академилэн академикез (1998)
  • Удмурт кун университетлэн почётной профессорез (1998)
  • Удмурт Элькунысь наукая Академилэн академикез (2003)

И. В. Таракановен Тунсыко вераськонъёс:

Тараканов И. В. Айкай гурезь йылысен кыдёке адӟиське: беседа с д-ром филол. наук, проф. УдГУ / И. В. Тараканов; Записала Г. Романова // Удмурт дунне.— 2003.— 27 июня. (https://vorshud.unatlib.ru/index.php/Тараканов_Иван_Васильевич)

Уже кутэм литература

  1. Карпова Л. Л. Профессор И. В. Тараканов и удмуртское языкознание (к 85-летию со дня рождения) / Л. Л. Карпова // Ежегодник финно-угорских исследований.— 2014.— №1.— С. 9–14.
  2. Кондратьева Н. В. Иван Васильевич Тараканов: памяти учителя / Н. В. Кондратьева // Linguistica Uralica.— 2018.— №2.— С. 158–159.
  3. Официальный сайт Архивной службы Удмуртии / URL: http://gasur.ru (дата обращения: 24.11.2021).
  4. Тараканов Иван Васильевич / Виртуальный музей ВОВ РТ (https://tatfrontu.ru/person/tarakanov-ivan-vasilevich)
  5. Тараканов И. В. Айкай гурезь йылысен кыдёке адӟиське: беседа с д-ром филол. наук, проф. УдГУ / И. В. Тараканов; Записала Г. Романова // Удмурт дунне.— 2003.— 27 июня.

Сына йырвизьдэ

  1. Удмурт кылын пӧртэм кылъёсысь асэстэмъёс кутӥсько: булгар, бигер, ӟуч, араб, перс но мукет.
  2. И. В. Таракановлэн «Исследования и размышления об удмуртском языке» ужысьтыз люкетэныз тодматске но вералэ, кыӵеоссэ араб но перс асэстэмъёсты Тӥ вераськонады кутӥськоды?
«Исследования и размышления
об удмуртском языке», 1998, с. 303