Михаил Гаврилович Атаманов

Научно-биографической экскурсия

Михаил Гаврилович Атаманов

Научно-биографической экскурсия

Костина Ксенья Георгиевна
Дышетон удысысь йӧскалык ужпумъёсты
эскеронъя тодос институтысь ӧнерчи

Михаил Гаврилович Атаманов
19.09.1945

литературный псевдоним —
Атаманов-Эграпи Гавир Микаль

протодиакон Михаил Атаманов

Вордскиз 19-куарусёнэ 1945-тӥ арын Грак ёросысь Вуж Эгра гуртын крестьян семьяын.

Пуклё-Эгралан школаын но Асанысь совхоз-техникумын дышетскиз.

1965–1968-тӥ аръёсы армиын служить кариз. Бертыса гуртаз кӧня ке зоотехник луыса ужаз.

1970–1975-тӥ аръёсы Удмурт кун университетлэн филологи факультетэзлэн удмурт ёзэтаз дышетскиз.

1975–1978-тӥ аръёсы Эстониысь Тарту университетлэн финн-угор кафедраезлэн целевой аспирантураяз дышетскиз.

1979–1989-тӥ аръёсы Удмурт научно-исследовательской институтын кылъя ёзэтын ужаз.

1989-тӥ арысен черкын ужаны кутскиз.

М. Г. Атамановлэн анаез но атаез

1978-тӥ арын «Этнонимы удмуртов в топонимии» темая кылосбур тодосъя кандидатской диссертацизэ утиз. Тодослыко кивалтӥсез П. Аристэ вал.

1996-тӥ арын «Топонимические пласты Камско-Вятского междуречья в контексте формирования этнической территории удмуртов» темая кылосбур тодосъя докторской научной докладзэ утиз.

Михаил Гаврилович — тодосчи

«Удмуртская ономастика: этнонимика; топонимика; антропонимика» (1988)

Удмуртская ономастика: этнонимика; топонимика; антропонимика

Удмурт кылтодонын нырысетӥзэ валче эскеремын ономастикалэн валтӥсь люкетъёсыз: этнонимика — родо-племенной группаослэн кылдэмзы; топонимика — географи нимъёс но соослэн кылдэмзы; антропонимика — удмуртъёслэн ас нимъёссы но фамилиоссы.

«История Удмуртии в географических названиях» (1997)

История Удмуртии в географических названиях

Таяз книгае авторлэн топонимикая эскерон ужъёсыз, гожтэм легендаосыз но мадёнъёсыз пыртэмын. Пумаз географи нимъёсын вакчи историко-этимологической кыллюкам сётӥське.

«Удмурт нимбугор. Словарь личных имён удмуртов» (1990)

Удмурт нимбугор. Словарь личных имён удмуртов

Кыллюкаме воргорон но кышномурт, вашкала но туала, удмурт но мукет кылъёсысь асэстэм антропонимъёс пыртэмын.

«По следам удмуртских воршудов» (2001)

По следам удмуртских воршудов

Ужын Волга но Кама вискын улӥсь удмуртъёслэн 70 воршудъёссылэн кылдэмзы но азинскон сюрессы эскериське.

«От Дондыкара до Урсыгурта. Из истории удмуртских регионов» (2005)

От Дондыкара до Урсыгурта. Из истории удмуртских регионов

Удмурт историографиын удмурт калыклэн кылдэм но азинскем улосвылъёслы но нимысьтыз ёросъёслы нырысетӥзэ историко-лингвистической описание сётӥське.

«Происхождение удмуртского народа» (2010)

Происхождение удмуртского народа

Монографиын нырысетӥзэ эскериське Россиысь вашкала финн-угор этнослэн, удмуртъёслэн, кылдэмзы. Инъет луыса кутӥсько этнографияя, кылтодонъя, археологияя источникъёс.

«Песни и сказки ушедших эпох:
Эгра кырӟа, Эгра вера» (2005)

Песни и сказки ушедших эпох: Эгра кырӟа, Эгра вера

Автор пӧртэм ласянь возьматэ вордскем гуртсэ: вашкала но туала историзэ, фольклорзэ, вераськон кылызлэсь аспӧртэмлыкъёссэ (кыллюкамен ӵош), микротопонимиказэ.

«Язык земли Удмуртской:
историко-этимологический словарь топонимов
Волго-Уральского региона» (2015)

Язык земли Удмуртской: историко-этимологический словарь топонимов Волго-Уральского региона

Кыллюкаме Волго-Уральской улосвылысысь удмурт лулчеберетэн но кылэн герӟаськем географи объектъёслэн нимъёссы люкамын.

Михаил Гаврилович — чеберлыко литератураез кылдытӥсь

«Тангыра. Кузьмадёс» (2008)

Тангыра. Кузьмадёс

Кузьмадёслэн инъетаз вашкала удмуртъёслэн улонысьтызы исторической легендаоссы но мадёсъёссы (обрядовой но мукет кырӟанъёссы, куриськонъёссы-вӧсяськонъёссы) кутэмын.

2012-тӥ арын автор кузьмадёссэ ӟуч кылэ берыктӥз.

Валче уломе!
«Тангыра» эпосысь кырӟан

Кылзэлэ каль, эшъёсмы-занӥосмы,
Тангыра куара мар вера!
Бен, бен! гинэ шуомэ ук, дой но, занӥосмы!

Ас вордскем калыкеныды
Котьку но валче улэ со шуэ!
Бен, бен! гинэ шуомэ ук, дой но, занӥосмы!

Ум люкиське огмылэсь огмы
Та дуннеын улытозямы!
Бен, бен! гинэ шуомэ ук, дой но, занӥосмы!

Валче гинэ уломе, бечеосмы,
Кема гинэ уломе, занӥосмы!
Бен, бен! гинэ шуомэ ук, дой но, занӥосмы!

Ву вылэ из лӧптытозь но,
Ву пыдсы шукы выйытозь
Бен, бен! гинэ шуомэ ук, дой но, занӥосмы!

Эграпи Гавир Микаль. Тангыра: кузьмадёс.— Ижкар, 2008.— 271–272 бамъёс

«Тангыра» эпослы
тодосчиос таӵе дунъет сёто:

«Та книгалэн потэмезлы шумпотонлэн пумыз ӧй вал <…> Со — удмуртлыкмес ӝутыны бадӟым юрттэт. Нимыз ик, шорсюлэм суредэз ик кыӵе: тангыра! Куке но вырӟем, ӝутскем удмурт калык, чильк-вальк шудӥсь Шундыпуксёнлэсь мальдыса, оло, сылмыны ни кутске. Сое выльысь сайкатытэк, пыдлось выжыосызлэсь кужымзэс тодаз вайытэк уг луы».

Ванюшев В. Тангыра ӧте, кырӟа, бӧрдэ… // Кенеш.— 2009.— №10.— С. 90–98

«Выжы калыклэн аслаз кузьмадёсэз (эпосэз) вань ке, со калыклэсь быдэ вуэмзэ возьматэ. Удмурт эпослэн кылдон сюресэз кузь вал. Со вера, удмуртлэсь асваланэз туж ӝегаса-могаса азинскиз шуыса. Михаил Гаврилович Атамановлэн «Тангыра» кузьмадёсэз потӥз. Со зэмос история, калык мадёс, кылан-буранъёс вылэ пыкиськыса гожтэмын, жиль-жиль чебер удмурт кылын чузъяське».

Яшина Р. Валче уломе, кема уломе! // Кенеш.— 2009.— №10.— С. 99–102
«Ньыль зарезь пыр — Иерусалиме» (1994)

Ньыль зарезь пыр — Иерусалиме

Та ужлэн авторез 1994-тӥ арын вуылӥз Инмар Пилэн Иисус Христослэн, Солэн дышетскисьёсызлэн, Инмар Анайлэн улэменызы герӟаськем святой интыосы. Аслаз та ужаз со вера аслэсьтыз адӟемъёссэ, ӝутэ осконэн герӟаськем куд-ог ужпумъёсты. Кыкетӥ люкетаз автор маде осконэ вуэм сюресэз но Библиез берыктыны кутсконэз сярысь.

«Мон — удмурт. Малы мыным вӧсь» (2007)

Мон — удмурт. Малы мыным вӧсь

Аслаз очеркъёсаз-малпаськонъёсаз черкын ужась писатель сюлэмшугьяськыса ӝутэ туннэ нуналысь удмурт калыклэн, тодмо но тодмотэм муртъёслэн улонэнызы, инкуазез, экологиез, осконэз утёнэн герӟаськем ужпумъёсты. Кузё-Инмарлэсь курон-косонъёссэ тодытэк, санэ понытэк, кабыл басьтытэк, ог-огдэ, аслэсьтыдзэ но, мукетсэ но калыкез гажатэк, яратытэк улон вае куашкан, сӧриськон, тупатэк улон, бырон, нош таос ваньмыз малпаськись муртэ вӧсь каро.

Михаил Гаврилович — визьнодкылъёсты (проповедьёсты) гожтӥсь

«Оскон, оскиськон, яратон» (2007; 2008)

Оскон, оскиськон, яратон

Книга сӥземын Инмар кылэз, черк улонэз, христиан праздникъёсты, дун-чылкыт улӥсьёслэсь улон-вылонзэс тодэмзы потӥсьёслы.

«Инмаре, жаля монэ» (1995)

Инмаре, жаля монэ

Инмар кылэз тодытон (проповедьёсын) книга.

«Улонлэн ошмесэз доры» (2008)

Улонлэн ошмесэз доры

Таяз книгаын М. Г. Атаманов калыкез сюлмаськытӥсь юанъёслы валэктонъёс сётэ.

Михаил Гаврилович — кылысь кылэ берыктӥсь

Библия (2013)

Библия

Протодиакон Михаил Атаманов Библиез удмурт кылэ берыктӥз.

Богословской редакторез Хельсинкиысь Марья Картано вал.

Михаил Гавриловичлэн берло аръёсы печатлам выль ужъёсыз

«Улон-вылон дауркае…: Тодэ ваёнъёс» (2020)

Улон-вылон дауркае…: Тодэ ваёнъёс

Книгае пыртэмын М. Атамановлэн, тодосчилэн но публицистлэн, тодэ ваёнъёсыз.

«Улон сюресъёс… Инмарлэн паймымон ужъёсыз» (2020)

Улон сюресъёс…
Инмарлэн паймымон ужъёсыз

Книгае люкамын М. Атамановлэн, Библиез удмурт кылэ берыктӥсьлэн но черкын ужасьлэн, тодэ ваёнъёсыз но пӧртэм малпанъёсыз.

«От Вятки и Камы до Оби и Енисея — путь неблизкий: из экспедиционных дневников учёного» (2020)

От Вятки и Камы до Оби и Енисея…

Книгае авторлэн 70–80-тӥ аръёсы этнографияя, ономастикая, фольклоръя но диалектологияя экспедициосын люкам материалъёсыз пыртэмын.

Материал Удмурт Элькунын, бускель элькунъёсын, Волго-Уральской регионын но Лымшор но Шундыпуксёнпал Сибирьысь улосвылъёсын улӥсь удмурт калыклэсь гожтэмын. Информантъёслэн историяя но этнографияя, кылъя но ономастикаяя верам ивортодэтъёссылы вакчияк тодослыко валэктон сётӥське.

Экспедициосын ужамлэн огъянъёсыз книгалэн азькылаз пыртэмын.

«Интервью. Вы спрашиваете — я отвечаю = Тӥ юаськоды — мон верасько» (2021)

Интервью. Тӥ юаськоды — мон верасько

Юан-валэктон формаен (интервью) гожтэм книга. Книгаын черкын ужась, вӧсяськись, миссионер-публицист, тодмо тодосчи, гожъяськись туала адямиез сюлмаськытӥсь юанъёслы валэктон сётэ.

Михаил Гавриловичлэн ужъёсыз вӧлдӥськемын пӧртэм кунъёсы

Михаил Гаврилович Атаманов — со:

В. В. Путин Президентлэн указэзъя, М. Г. Атамановлы «За заслуги перед Отечеством» орденлэн II степенё медалез сётэмын.

Уже кутэм литература

  1. Издательство Шелест / URL: http://shelest18.tilda.ws (дата обращения: 11.11.2022)
  2. Кенеш: литературно-художественной но общественно-политической журналзы / Удмурт Элькунысь писательёслэн огазеяськонзы.— Ижевск, 2020.— №07.
  3. Официальный сайт Национальной библиотеки Удмуртской Республики / URL: https://unatlib.ru (дата обращения: 21.10.2022)
  4. Христолюбова Л. С. Ученые-удмурты: биобиблиографический справочник / Л. С. Христолюбова.— Ижевск: Удмуртия, 1997.— 860 с.
  5. Ученый, писатель, публицист, миссионер Михаил Гаврилович Атаманов-Эграпи: краткий библиографический справочник / сост. Е. Булычева, И. Рысаев; отв. ред. Атаманов-Эграпи Гавир Микаль.— Ижевск: МарШак, 2016.— 68 с.

Сына йырвизьдэ

  1. М. Г. Атамановлэн «Удмуртская ономастика: этнонимика; топонимика; антропонимика» (1988, с. 11) ужысьтыз суредэз учке но вералэ, кыӵе этнонимъёссы вань удмуртъёслэн?
  2. Кытын удмуртъёсты вотяк, одо яке ар нимало?