Лидия Дмитриевна Чернова

Литературно-биографической экскурсия

Лидия Дмитриевна Чернова

Литературно-биографической экскурсия

Людмила Васильевна Бусыгина,
ведущий научный сотрудник
КНУ УР «НИИ национального образования»

Лидия Дмитриевна Чернова
1927

Нылпи кылбурчи. Вордӥськиз Эгра ёросысь Зура черкогуртын.

Одӥг выжыысь — куинь гожъясьчиос: нылпи кылбурчи Лидия Чернова, нылыз Татьяна Чернова но нунокез — Алёна, Дарали Лели. Лидия Дмитриевна ик Татьяналы но Алёналы кылбуретлы яратон но пыӵатӥз.

Нылы но анае.
Мон висказы.
Огез — нордӥ турын кадь нижырес.
Мукетыз нош — сусыпу кадь зугырес.
Мон шоразы.
Тӧдьы веськрес льӧмпу.
Уй пал тӧллы пумит нюръяськыку
Пурӟо, тӧлӟо сяська пурыосы,
Ненег турын вылэ усё пырыосын,
Утё кадь кынмемлэсь, дырыз ай вуытэк.
…Нош тӧл лопыръяське, лӧбыръяське,
Лымы килен-бубылиенйырси вылэ ваське.
Ӵужам-гужам дэремъёсыз но юдэсэн кеся,
Ваньзэ вормо, ӝипто кожа, лэся.
Сыӵе дыръя йырме мыкыртӥсько,
Зэмам уйвӧтэным люкиськисько
Выль тулысозь…
Нош сусыпу…
Озьы уг улы со.
Котьку но вожпыръем, ӟуг, ваменэс тусо.
Веньёсыныз бышке мерскись тӧлэз,
Уно арен кыдатэмын юн чиданэз.
Озьы ик улысал — ваче
Ӵош тупаса, уртче.
Нош улонлэн киыз
Мукет муэ мерттэ выльзэ кидыс.
Вож льӧмпуэз
Нордӥ турынэныз валче
Выжтэ мукет сике.
Озьы ке но,
Бурдо кариськыса бертӥськомы.
Дор выжымес ум на вунэтӥське.

Т. Чернова
Пиналлэсь сямъёссэ со, куать нылпиё анай, зэмос улонъя ӟеч тодэ. Соин сокем тунсыкоесь образъёс, югдуръёс но геройёс кузёясько кылбуръёсаз.

Вамыш бӧрсьы вамыш, тубат бӧрсьы тубат… Корка пушкысь — азбаре, ураме, отысен — шур дуре но нюлэскы… Озьы нылпилэн дуннеез паськыта. Нылпи будэ, визьмаське, улонэн тодматске. Нош Лидия Чернова кылбуръёсаз солы юрттэ котырысь дуннеез шӧдыны-кылыны. Пиналлэн сюрс но сю юанъёсызлы тунсыко валэктонъёс сётэ.

Кытчы дыртэ зоркибы? Йӧ ӟугыриысь кӧня меда вушапык усёз? Ма луэ, кезьыт йӧэз сииськод ке? Кытысь ӵын куды шедьтыны? Вань та юанъёслы валэктонъёс шедьтыны быгатоды Лидия Черновалэн кылбуръёсысьтыз.

Нылпиосты тужгес но синмаськыто Л. Черновалэн кузь кылбуръёсаз-выжыкылъёсаз: «Нюлэс школа», «Нюлэс кушын ӵошатскон». Автор быгатыса суреда пӧйшуръёсты, тунсыко мадёнзэ радъяны.

Горд Коньы, шуо, толон
Кыз борды ошем ялон:
«Усьтӥське нюлэс школа,
Лыктэ, лыктэ куш пала!»

Кылбурчи быгатыса куараосын шудэ, яркытэсь, син азе пуктымон образъёс кылдытъя:

 

Пыштурын, пыӵтурын,
Ческыт зыныз корка тыр.
Самовармы ӝӧк вылын,
Чай юыны тон но пыр.
Пыштурынэн чай вӧзы
Тэркыен пуктӥм узы.
Ӵыжыт кисьмам узыос
Ыме пыро асьсэос!..
Пӧсямы, ӵыжектӥмы —
Тӥнь кыӵе милям чаймы!

Кылбурчиез данъяса

Удмурт Элькунысь лулчеберетъя министерстволэн почётной грамотаез, 1997.

Удмурт Элькунысь писательёслэн огазеяськонзылэн ёзчиез, 2002.

Удмурт Элькунысь ветеранъёслэн огазеяськонзылэн почётной грамотаез, 2007.