Герман Алексеевич Ходырев. Литературно-биографической экскурсия

Герман Алексеевич Ходырев

Литературно-биографической экскурсия

Людмила Васильевна Бусыгина,
ведущий научный сотрудник
КНУ УР «НИИ национального образования»

Герман Алексеевич Ходырев
1932–1995

Нылпи кылбурчи, журналист, Удмуртиысь калык писатель

Вордӥськиз Алнаш черкогуртын, дышетӥсьлэн семьяяз.

Вуж Утчанысь семилеткаез йылпумъяса, Герман атаезлэн пытьыетӥз мынӥз — 1948-тӥ арын Можга педучилищее дышетскыны пыриз.

Г. Ходырев (бурпаласез) Можга педучилищеын дышетскон вакытаз. 1951-тӥ ар

1955–1960-тӥ аръёсы дышетскиз Удмурт пединститутын.
Пединститутын дышетскыкуз ик Герман Алексеевич поттӥз ни
«Милям азбарамы» но «Кызьы мон будӥ» шуыса нимаськись нылпиослы книгаоссэ.

Трос аръёс ӵоже Герман Алексеевич ужаз удмурт нылпи
«Дась лу!» газетын но «Кизили» журналын.

Бадӟым сюлэмо, туж узыр лулпуш дуннеё, пӧртэм удысъёсын ужаны быгатӥсь, паськыт таланто адями вал Герман Алексеевич. «Кизилиын» ӵош ужам эшез, удмурт кылбурчи Ульфат Бадретдинов тодаз вае: «Балалайкаен но шудэ вал. Герман Алексеевич но балалайка ог-огзылы тупамын вал. Кыкназы ик пичиесь, шумпричесь, ог-огзэс туж ӟеч валасесь. Мултэс кыл вератэк, асьсэ бордазы уно адямиосты кыскылӥзы».

Герман Алексеевич пушкын улӥзы кылбурчи но крезьгурчи.

Герман Алексеевич аслаз книгаосаз вазиське: яратэ, уте котыр дуннеез, шумпотыны быгатэ, соку вань выжыкыло малпанъёсты одно ик быдэсмозы.

Герман Алексеевичлэн геройёсыз — Кузьгубей, Тэшкыли, Покчи Дэменчи, Чебеляй.

«Тэшкыли но Кузьгубей» выжыкыл-поэмаяз автор инкуазез утён тема ӝутэ. Кузь, ӝужыт мугоро Кузьгубей шуэ: «Ӝокасько, пе, нюлэскын, шокаме потэ эркын», озьы со аслыз выль улон инты лэсьтэ, котырысьтыз вань будосъёсты кора. Таин сэрен солы трос курадӟонъёсын пумиськоно луэ, угось инкуазь солы «пунэмзэ берыктэ». Кузьгубейлы юрттэ покчи мугоръем Тэшкыли — визь-кенешен но, ужен но.

Мугорын но висъянтэм,
Восьтэтгес, пичи.
Ваньзэ йӧндыре, лэсьтэ
Пичи дэменчи.
Котьку лачак эшъёсын,
Чупырес, шаплы.
Жадён ӧвӧл со вӧзын,
Быромем ужлы…

Г. А. Ходырев Шаркан ёросысь Сосновка шор ёзо школаысь нылпиосын

«Мултэс индылытэк, шудон-серекъян, шуныт кыл пыр Герман Алексеевич туж кулэ уж быдэсъяз — ӟеч муртъёсты будэтӥз. Шуныт кыл нокинлы мултэс ӧвӧл уго. Ӟеч кыл ӝужась узьымлы сылал ватсэт выллем луэ. Калык кылбурчи сое умой валаз»,— шуо Герман Алексеевичлэн дышетэм-будэтэм нылпиосыз но ӵош ужась эшъёсыз.

Г. Ходырев проза удысын но тыршиз. Печатласькиз ньыль проза книгаез: документальной мадёсъёс «Ӧрзи» (В. В. Голубевен ӵош, 1969) но «Солдат Спиридон Стрелков (1976), пиналъёслы веросъёсыз «Кытчы лобо пилемъёс» (1980) но тодэ ваёнъёсыз «Ӟеч визь-кенеш котьку дуно» (1989). «Ӧрӟи» мадёсэз сӥземын Гастелло сямен бырем лётчиклы, Пётр Бабкинлы, «Солдат Спиридон Стрелков» С. М. Стрелков Совето Союзлэн героезлы.

1982-тӥ арын Г. Ходыревлэн «Зор, зор, зорые!» но «Скачи, мой конь!» книгаосыз Удмуртиысь комсомоллэн госпремиеныз пусъемын.

Герман Алексеевич гожъясьчиосын «Удмурт литературалэн но искусстволэн нуналъёсаз». 1985-тӥ ар, Москва

Кылбурчи, журналист

Росси Федерациысь гожъяськисьёслэн огазеяськонзылэн ёзчиез

Удмуртиысь калык гожъяськись

РСФСР-ысь калыкез дышетонъя отличник

УАССР-ысь лулчеберет удысын сӥё-дано ужась

Комсомол Удмуртии премилэн лауреатэз

Г. Ходыревлэн нимыныз Ижкарысь 20-тӥ номеро школаысь Литературной шаертодонъя музей нимамын.

Кылбурчилэн улэм корказ (ул. Пушкинская, 217) мемориальной пул ошемын.

Гожъяськисез тодэ возён вылысь но солэсь творчествозэ калыке вӧлмытон понна удмурт лулчеберетъя «Дэмен» огазеяськонэн но «Ӟечбур» газетэн юнматэмын Герман Ходырев нимо йӧскалык преми.