Вениамин Никонорович Ившин

Литературно-биографической экскурсия

Вениамин Никонорович Ившин

Литературно-биографической экскурсия

Людмила Васильевна Бусыгина,
ведущий научный сотрудник
КНУ УР «НИИ национального образования»

Вениамин Никонорович Ившин
1947

Тодмо удмурт гожъясьчи. Россиысь писательёслэн огазеяськонзылэн ёзчиез, Удмуртиысь (1994) но Россиысь (1998) лулчеберет удысысь сӥё-дано ужась.

Вордӥськиз Кез ёросысь Ванялуд гуртын. Гуртсы пичи гинэ вал, ог куамын корка, нош солы бадӟым потылӥз. Со пичи гуртэзлэн огшоры кадь улон ӧрез но, визылась гинэ шурез но, котырысь тэльёс, бусыос но Ванялудысь Венялэн улоназ туж бадӟым инты басьтӥллям.

Ванялуд котыръёсын

1976-тӥ арын потэм «Мар дуно»
нырысетӥ кылбурет бичетэз

— Мар дуно тӥлед, шуръёс?—
                            вералэ мыным!
— Ошмесъёс!— вунэтонтэм
                            кылӥськиз мыным!
— Мар дуно тӥлед, лудъёс?—
                            валэктэ мыным!
— Зор гуръёс!— ю тулкымъёс
                            гурлазы мыным.
— Чагыр ин!— жингыртӥзы
                            тюрагай гуръёс.
— Югыт сад!— чузъяськизы
                            ӵуж уӵы гуръёс.
— Мон учки но котырак —
                            ӵыдонтэм шаер.
— Мон тыныд йыбырттӥсько,
                            вордӥськем шаер.

Пинал дырысь инкуазь куараосты шӧдыны-кылыны быгатэмез юрттэ гожъясьчилы жингрес рифмаосын «шудыны». Чур бӧрсьы чур солэн кылбуръёсыз люкасько нимысьтыз книгаосы.
«Нылпи литератураез лыдӟыса гинэ пиналъёслэсь сямъёссэс уд тоды. Та ласянь улон ачиз узыр сандыксэ усьтэ. Мылкыдыд, чакласькыны быгатонлыкед гинэ мед луозы»,— шуэ Вениамин Никонорович.
Кылбуръёсыз туж пӧртэмесь: вань ӝогверанъёсыз но, чылкверанъёсыз но, кыл шеронъёсыз, исаськонъёсыз, пӧллёнъёсыз, мадиськонъёсыз, вукылэс выжыкылъёсыз.

Туж тунсыкоесь Вениамин Никоноровичлэн «Нуны вешан гуръёсыз», «Мусоян кылъёсыз», «Курдатон кылъёсыз», «Алон кылъёсыз», «Тэтчатон кылъёсыз» но мукет:

Ветлыны дышетон кыл

Ой, Тэтэ,
Ой, Тэтэ,
Кӧкыез доры
Султэ.

Алон кыл

Кикыед наштаськемын,
Бамиед но курмемын,
Ойдо, мисьтӥськы, нылы,
Ӧд ке кылзӥськы, шаплы
Таня-паня шуозы,
Сереме уськытозы!

Тылобурдо куараосын тырмемын В. Ившинлэн
«Шуланэ дас вить» книгаез.

Вениамин Ившин трос ужа кылысь кылэ берыктон уж бордын. Удмурт кылэ берыктӥз ӟуч классикъёслэсь А. Пушкинлэсь, Ю. Лермонтовлэсь, Н. Некрасовлэсь куд-ог произведениоссэс. А. С. Пушкинлэн вордскем дырысеныз 200 ар тырмонэзлы, поэт берыктӥз «Поп сярысь но солэн визьтэм ляльчиез сярысь выжыкыл» произведенизэ. Та ужлы бадӟым дунъет сётӥз С. В. Михалков. Москваысь Правительствоен ялэм ӵошатсконаз «Лучшие переводы русской классики» номинациын та книга кык премия басьтӥз.

Вениамин Никоноровичлэн тросэз кылбуръёсыз кырӟан луизы.

Кылсярысь, Г. Корепанов-Камский гинэ ог дас витезлы крезьгур гожтӥз: «Льӧль кырӟан», «Тэтэ», «Ӵӧжпиос» но мукетсэ.